Juventusi ka ndarë 25 milionë euro për Aquilanin

Juventusi është i gatshëm të dërgojë ofertë prej 25 milionë eurosh në tavolinën e Romës për Alberto Aquilani, derisa Zonja e Vjetër planifikon edhe një përpjekje të fundit për të marrë shërbimet e mesfushorit.
Bardhezinjtë kanë qenë në kërkim të një mesfushori të klasit gjatë gjithë verës, por kanë qenë të paaftë të kapin cakun. Ndër të dëshiruarit e Claudio Ranierit ishte Xabi Alonso, por ky transferim ishte i parealizueshëm.

Aquilani ka qenë alternativa tjetër, por tentimet e Juventus më herët kanë qenë të dështuara. Zonja e Vjetër tash është e gatshme të futë dorën ca më thellë në arkë, dhe të gjejë 25 milionë dollarë, që mbase do të ishin të mjaftueshme që Roma të heqë dorë nga Aquilani.

Mesfushori thuhet se merr një shumë prej 900 mijë eurosh për sezon në Olimpico, ndërsa ka kërkuar që kjo të arrijë në 2.5 milionë në vit, por kjo kërkesë është refuzuar nga Roma.

Mediat italiane shkruajnë se Juve do t’i ofrojë Aquilanit një pagë vjetore prej 3.2 milionë eurosh për sezon, por së pari duhet ta bindë Romën për shitje.