Rise: Toti është "Zot i futbollit

Futbollisti norvegjez, Jon Arne Rise (28-vjeç), i cili është përforcimi i Romës për edicionin e ri, e ka vlerësuar kapitenin e skuadrës verdhekuqe Françesko Toti, si "Zot të futbollit". Pas shtatë vjetësh të kaluara në skuadrën e Liverpulit, Rise muajin e kaluar nënshkroi për Romën.
"Për fat të keq ende nuk e kemi pasur rastin të stërvitemi bashkë, ngase ai kthehet pas shërimit nga lëndimi, por ai është një futbollist i jashtëzakonshëm, një 'Zot i futbollit'", ka pohuar Rise. "Kur kam ardhur në Romë, më ka përshëndetur përzemërsisht, edhe pse nuk flet anglisht dhe më ka shtrënguar dorën fortë. Ai është një djalosh shumë simpatik, gjithmonë i hareshëm, kurse si lojtar e përsëris edhe një herë është fantastik", ka shtuar Rise, i cili më pas ka folur edhe për skuadrën e tij të re. "Roma është një skuadër e shkëlqyeshme, e aftë për të fituar titullin e kampionit, Kupën e Italisë dhe Ligën e Kampionëve. Vetë fakti që unë kam ardhur këtu, do të thotë se besoj se kjo është një skuadër triumfuese, në të cilën shpresoj të jap një kontribut të madh", ka përfunduar Rise.